باوه‌ڕدارانی ئاینی هیندۆز له‌هندستان پێیانوایه‌ مانگا ئاژه‌ڵێكی پیرۆزه‌و میزه‌كه‌ی‌ چاره‌سه‌ری‌ زۆر نه‌خۆشی ده‌كات، ئه‌مه‌ش هاوشێوه‌ی‌ چاره‌سه‌ره‌كه‌ی‌ مه‌لا عه‌لی‌ كه‌ڵه‌كه‌ كه‌ پێی‌ وایه‌ میز چاره‌سه‌ی‌ شێرپه‌نجه‌یه‌.

به‌پێی هه‌واڵێكی ده‌یلی مه‌یلی به‌ریتانی، شوێن كه‌وتوانی ئه‌و ئاینه‌ ژماره‌یان له‌زیادبووندایه‌‌و پێیانوایه‌ خواردنه‌وه‌ی‌ میزی‌ مانگا به‌تازه‌یی ده‌وایه‌كی باشه‌ بۆ جۆره‌ جیاوازه‌كانی شێرپه‌نجه‌‌و نه‌خۆشییه‌ كوشنده‌كان، ئه‌و چاره‌سه‌ره‌ش دیاری‌ خوداوه‌ند ناوده‌به‌ن.

جایرام سینگال، وه‌ك نمونه‌ی‌ یه‌كێك له‌و نه‌خۆشانه‌ی‌ كه‌سودیان له‌خواردنه‌وه‌ی‌ میزی‌ مانگا كردووه‌، له‌لێدوانێكیدا بۆ ده‌یلی مه‌یل رایگه‌یاندووه‌ " ماوه‌ی‌ زیاتر له‌ 10 ساڵه‌ میزی‌ مانگا ده‌خۆمه‌وه‌‌و پێشتر نه‌خۆشی شه‌كره‌م هه‌بوو ، به‌ڵام له‌ئێستادا نه‌خۆشییه‌كه‌م كۆنترۆڵكراوه‌‌و پزیشكه‌كان پێیان راگه‌یاندوم، سودی‌ زۆرم له‌پێكهاته‌كانی میزی‌ مانگا كردووه‌".

سینگاڵ ده‌شڵێت " خواردنه‌وه‌ی‌ میزی‌ مانگا له‌به‌یانیاندا كاریگه‌ری‌ زیاتره‌‌و رۆژانه‌ ده‌یان كه‌س له‌به‌رده‌می ماڵه‌كه‌مان كۆده‌بنه‌وه‌ بۆ وه‌رگرتنی میزی‌ مانگا.

ئه‌مه‌ له‌كاتێكدایه‌، مه‌لا عه‌لی كه‌ڵه‌ك كه‌دانیشتوی‌ شاری‌ هه‌ولێره‌، پێشتر رایگه‌یاندبوو" میز چاره‌سه‌رێكی باشی نه‌خۆشییه‌".

ئه‌و پێی‌ وایه‌ كه‌ میزی‌ مرۆڤ یان میزی‌ حوشتر باشترین چاره‌سه‌ره‌ بۆ نه‌خۆشی‌، ده‌شتوانێت چاره‌سه‌ری‌ نه‌خۆشیه‌كانی‌ شێرپه‌نجه‌ و شه‌كره‌ چه‌ندین نه‌خۆشی‌ تر بكات.
____________